分享到: 更多>>

འཁྲུངས་སྐར་སྔོན་བརྡ།

2017-11-08

 

  བོད་ཟླ་༩ཚེས་༢༢དང་སྤྱི་ལོ2017. 11. 10ཉིན་ནི་དགེ་བའི་བཤེས་གཉེན་ཆེན་པོ་༧མཁན་ཆེན་དམ་པ་ཤེས་རབ་བཟང་པོ་མཆོག་མི་མཇེད་འཇིག་རྟེན་གྱི་ཞིང་འདིར་མཚན་དཔེའི་མེ་ཏོག་བཞད་པའི་འཁྲུངས་སྐར་གྱི་ཉིན་མོ་ཡིན་པས། མཁན་རིན་པོ་ཆེ་ཁོང་ཉིད་ཀྱི་གཙོས་བསྟན་པ་འཛིན་པའི་སྐྱེས་བུ་གང་ན་སུ་བཞུགས་པ་ཐམས་ཅད་སྐུ་ཚེ་མི་ཤིགས་རྡོ་རྗེའི་གཤིས་སུ་ཉེ་བར་འཚོ་བའི་ཆེད་ཕྱོགས་སོ་སོར་སྲོག་བླུ་དང་ཚེ་ཐར། མཆོད་མེ་འབུལ་བ།  སྙུང་གནས་ཀྱི་སྡོམ་པ་འབོགས་པ་སོགས་མདོར་ན་རྣམ་དཀར་དགེ་བའི་ལས་ལ་འབད་ཀྱིན་ཡོད་ལ། ལྷག་པར་དབེན་གནས་བཀྲ་ཤིས་ཁྲི་གླིང་གི་འདུས་སྡེ་སྤྱིས་ཉིན་གསུམ་གྱི་རིང་ལ་ཀུན་མཁྱེན་མི་ཕམ་རྒྱ་མཚོས་ཆོག་བསྒྲིགས་གནང་བའི་རཏྣ་ཚེ་སྒྲུབ་ཀྱི་དཀྱིལ་འཁོར་གཉན་པོ་ཞལ་ཕྱེས་ནས་འཚོག་བཞིན་ཡོད་པས། དུས་ཚོད་འདི་དང་བསྟུན་ནས་ཀུན་གྱིས་དགེ་བ་རེ་ཅི་འགྲུབ་བྱེད་རྒྱུ་ཧ་ཅང་གལ་ཆེ་བས་དེ་ལུགས་ཐུགས་ལ་མངའ་བར་འཚལ།

 

 

 

  དབེན་གནས་བཀྲ་ཤིས་ཁྲི་གླིང་གི་བོད་ཡིག་ཚོགས་ཆུང་ནས།

  

སྐྱབས་འགྲོའི་རྨང་གཞི་དད་པ་ཡིན། 皈依的基础

2017-11-07

  དཀོན་མཆོགས་གསུམ་ལ་སྐྱབས་སུ་འགྲོ་བའི་ཐོག་མར་རང་རྒྱུད་ལ་དད་པ་བརྟན་པོ་ཞིག་སྐྱེ་རྒྱུ་གལ་ཆེ་བ་ཡིན། དད་པ་ལ་སྐུ་གསུང་ཐུགས་རྟེན་གྱི་ཞལ་མཇལ་བ་དང་། དེ་དག་གི་ཡོན་ཏན་ཐོས་པ་དང་མཐོང་བ་ལྟ་བུས་རྐྱེན་གྱིས་སྐྱབས་སུ་འཆི་སྙམ་པའི་སེམས་དང་བ་འདྲེན་ནས་དད་པ་སྐྱེས་པ་ལྟ་བུ་དང་བའི་དད་པ་ཞེས་བྱའོ། །ཡང་ངན་སོང་གི་སྡུག་བསྔལ་ལྟ་བུ་ཐོས་ནས་དེ་དང་འབྲལ་འདོད་སྐྱེ་བ་དང་། །མཐོ་རིས་དང་ཐར་བའི་ཡོན་ཏན་ཐོས་ནས་ཐོབ་འདོད་སྐྱེ་བ་དང་། དགེ་བའི་ཡོན་ཏན་ཤེས་ནས་སྒྲུབ་འདོད་སྐྱེ་བ་དང་། སྡིག་པའི་ཉེས་མིག་ཤེས་ནས་སྤོང་འདོད་སྐྱེ་བ་རྣམས་ནི་འདོད་པའི་དད་པ་ཞེས་བྱའོ།།ཡང་བླ་མ་དཀོན་གསུམ་གྱི་བྱིན་རླབས་ཡོན་ཏན་རྣམ་དག་ཤེས་ཏེ། དུས་དང་གནས་སྐབས་ཀུན་ཏུ་སྐྱིད་སྡུག་གང་ལ་འཕྲད་ཀྱང་སྙིང་ཐག་པ་ནས་དཀོན་མཆོག་གསུམ་པོ་ཁྱེད་ཤེས་ཁྱེད་མཁྱེན་སྙམ་པ་མ་གཏོགས་རེ་ལྟོས་གཞན་ན་མེད་པར་ཤེས་པའི་དད་པ་ནི་ཡིད་ཆེས་པའི་དད་པ་ཞེས་བྱའོ།།དེས་ན་དད་པ་དཀར་པོ་དགེ་བའི་ཆོས་ཐམས་ཅད་ཀྱི་ས་བོན་ལྟ་བུ་ཤིན་ཏུ་གལ་ཆེ་བ་ཡིན་ལ། རང་རྒྱུད་ལ་དད་པ་མེད་ན་ས་བོན་མེས་ཚིག་པ་བཞིན་འབྲས་བུ་མི་འབྱུང་བ་ཡིན་ཏེ། མདོ་ལས། དད་པ་མེད་པའི་མི་རྣམས་ལ། །དཀར་པོའི་ཆོས་ནི་མི་འབྱུང་སྟེ། །ས་བོན་མེ་ཡིས་ཚིག་པ་ལ། །མྱུ་གུ་སྔོན་པོ་ཇི་བཞིན་ནོ། །ཞེས་གསུངས་པས་སོ།།

 

 

  དབེན་གནས་བཀྲ་ཤིས་ཁྲི་གླིང་གི་བོད་ཡིག་ཚོགས་ཆུང་ནས།

  

༈ སྐྲ་ཕུད་ཕུལ་བའི་རྒྱ་མི་འགའ་ལ་གདམས་པ།

2017-11-06

  མཁན་ཆེན་ཤེས་རབ་བཟང་པོས།

 

  ཁྱེད་རྣམ་པར་ཆོས་ལམ་དུ་འགྲོ་བ་དང་ཆོས་ཀྱི་མཐར་ཕྱིན་པའི་ཆེད་དུ། ད་སྐབས་དགེ་འདུན་འདུས་པ་ཡོངས་ཀྱིས་ངག་གིས་བཀྲ་ཤིས་བརྒྱད་པའི་ཁ་གཡང་བརྗོད། སེམས་ཀྱིས་བསམ་དོན་འགྲུབ་པའི་ཐུགས་གཏད་གནང་བ་རེད། དེས་ན་ཁྱེད་ཅག་གིས་ཀྱང་འདི་འདྲའི་གནས་ཁྱད་པར་ཅན་དང་དུས་ཁྱད་པར་ཅན་ལ་རང་ཉིད་ནང་པའི་ཆོས་སྒོར་ཞུགས་ནས་སྡོམ་པ་ཞུ་རྒྱུའི་སྐལ་བཟང་ཐོབ་པ་འདི་ནི། རང་གི་མི་ཚེ་ལ་སྔར་མེད་ཀྱི་རིན་ཐང་རྙེད་པའི་ཐབས་ཁྱད་པར་ཅན་ཞིག་ལ་ངོས་འཛིན་བྱས་ན་དོན་ལ་ཡང་དེ་འདྲ་རེད།

  དེ་ཡང་འདུལ་བ་མདོ་རྩ་བའི་དབུ་རུ་ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་ཏེ་ཞེས་གསུངས་པ་ལྟར། ཁྱེད་ཅག་ཆོས་པ་ཡང་དག་ཅིག་བྱེད་པ་ལ་ཐོག་མར་ཅིས་ཀྱང་ངེས་འབྱུང་གི་བསམ་པ་རྣལ་མ་ཞིག་ཡོད་པ་ནི་ཤིན་ཏུ་གལ་ཆེ་བ་རེད། དེའི་སྟེང་དུ་རིམ་པ་གཉིས་པ་བྱང་ཆུབ་ཀྱི་སེམས་རིན་པོ་ཆེ་རྒྱུད་ལ་འཁྲུངས་འཇུག་རྒྱུ་དེ་ཡང་ཤིན་ཏུ་གལ་ཆེ་བ་རེད།

 

  དེ་རིང་ནས་བཟུང་ཁྱེད་ཅག་རབ་ཏུ་བྱུང་བའི་དགོས་པ་ནི། མ་རིག་བག་ཆགས་མཐུག་པོའི་གཞན་དབང་གིས་ཐོག་མེད་ནས་འཁོར་བར་འཁྱམ་པའི་སེམས་ཅན་འདི་དག་ཐམས་ཅད་གནས་སྐབས་འཁོར་བའི་སྡུག་བསྔལ་དང་བྲལ་ཏེ་ནུབ་ཕྱོགས་བདེ་བ་ཅན་ལ་སོགས་པའི་ཞིང་དག་པ་རྣམས་སུ་སྐྱེ་ཕྱིར་དང་། མཐར་ཐུག་རྣམ་གྲོལ་གཏན་གྱི་བདེ་བ་རྫོགས་པའི་སངས་རྒྱས་ཀྱི་ས་ལ་འགོད་པར་བྱེད་པའི་ཕྱིར་དུ། ང་རང་གིས་རབ་ཏུ་བྱུང་བའི་དོན་ཆེན་འདི་ལྷུར་དུ་བླངས་པ་ཡིན་བསམ་དགོས། དེ་ལྟ་བུའི་བསམ་པ་རྒྱ་ཆེ་བ་ཞིག་རྒྱུན་དུ་རང་རྒྱུད་ལ་བརྟན་པོར་ཡོད་པ་ནི་ཤིན་ཏུ་རླབས་ཆེ་བའི་བདག་ཉིད་ཅན་ཡིན་པ་སྨྲོས་མ་དགོས་ནའང་། ད་སྐབས་ལྷག་པར་དེ་ལྟ་བུའི་བསམ་པ་ཞིག་སྐྱེ་བ་གལ་ཆེ་བ་རེད།

 

  བསམ་པ་རྒྱ་ཆེ་བ་གང་དེས་བརྩིས་ཟིན་པའི་འོག་ཏུ། ད་ནས་བཟུང་ཁྱེད་ཅག་གིས་ཐོས་བསམ་སྒོམ་གསུམ་ཡ་མ་བྲལ་བ་ཞིག་བྱས་ན། གང་ཟག་རང་ངོས་ནས་ཆོས་ཀྱི་མཐར་ཕྱིན་པ་དང་། གཞན་ངོས་ནས་རླབས་ཆེན་བསྟན་པའི་དོན་འགྲུབ་པར་བྱེད་པའི་རྒྱུ་རེད། ཡང་གཅིག་བཤད་ན། ཐོས་བསམ་སྒོམ་གསུམ་ནི་སངས་རྒྱས་ཐོབ་པ་ལ་མེད་ན་ཐབས་ཆག་དང་ཡོད་ན་དེས་ཆོག་གི་སྔོན་འགྲོ་དེ་རེད། ཁྱེད་ཅག་འདི་རུ་ཡོང་དོན་ཡང་། ཐར་བའི་སྣེ་མོ་ཞིག་ཨི་ཟིན་གྱི་དམིགས་ཡུལ་བཅངས་ནས་ཡོང་བ་ཤ་སྟག་རེད། དེས་ན། ཐར་བ་ཐོབ་དགོས་ན་ངེས་པར་དུ་རང་རྒྱུད་ལ་གཞན་དྲིང་མི་འཇོག་པའི་ཉམས་ལེན་ཡོད་དགོས། ཉམས་ལེན་ཡོད་དགོས་ན་ངེས་པར་དུ་ཐོག་མར་རྒྱལ་བའི་ཆོས་ཚུལ་འདི་དག་ལ་ཐོས་བསམ་ཐུ་མོ་ཞིག་ཡོད་དགོས་པའི་ཕྱིར་ན་ཐར་བ་དོན་གཉེར་ཅན་ལ་ཐོས་བསམ་སྒོམ་གསུམ་འདི་ཤིན་ཏུ་གལ་ཆེ་བ་རེད།

 

 

  ཅི་སྟེ་རབ་ཏུ་བྱུང་ནས་ཐོས་བསམ་སྒོམ་པ་གང་ལ་ཡང་མ་འབད་ན་ཡང་། ཚུལ་ཁྲིམས་སྲུང་བའི་ཕན་ཡོན་བླ་ན་མེད་པ་དེ་དག་ཡོད་པ་ནི་སྨྲོས་མ་དགོས་ཀྱང་། ས་ལ་གནས་པའི་སྐྱེས་བུ་འདྲ་ཡིན་ན་མ་གཏོགས། ཐོས་བསམ་སྒོམ་གསུམ་གང་ཡང་མེད་ན་རང་རྒྱུད་ཀྱི་སྡོམ་པ་ཡང་མཐར་ཕྱིན་ཟེར་བ་དེ་ཤིན་ཏུ་དཀའ་མོ་རེད། དེ་ལས་ཀྱང་། རབ་ཏུ་བྱུང་ནས་རང་རྒྱུད་ཅུང་ཟད་ཀྱང་མི་འདུལ་བར་ང་ནི་རབ་བྱུང་ངོ་སྙམ་པའི་སྔར་མེད་ཀྱི་ང་རྒྱལ་འཕེལ་ནས་མཐོ་བ་ལ་ཕྲག་དོག་དང་། མཉམ་པ་ལ་འགྲན་སེམས། དམའ་བ་ལ་ཁྱད་གསོད་ལ་སོགས་པའི་ལས་ངན་བསག་ན་ནི། ཁྱེད་ཅག་རབ་ཏུ་བྱུང་བས་གོ་མ་ཆོད་པར་མ་ཟད་ལམ་ཁ་འདི་ཉིད་གདམས་པ་ནི་རང་གིས་ནོར་འཁྲུལ་གྱི་བྱ་བ་ཞིག་བསྒྲུབས་པ་ལ་ངོས་འཛིན་བྱེད་ཆོག་ཆོག་རེད།

 

  རྒྱུ་མཚན་དེས་ན། རབ་ཏུ་བྱུང་ཕྱིན་བསླབ་པ་རིན་པོ་ཆེ་འདི་ཉིད་མིག་འབྲས་བཞིན་དུ་སྲུང་བའི་ཐོག་ནས་ཅི་ནུས་ཀྱིས་ཐོས་བསམ་སྒོམ་གསུམ་ལ་འབད་རྒྱུ་དང་། དེ་དག་གི་ཐོག་ལ་ཤིན་ཏུ་གལ་ཆེ་བ་གཅིག་ནི། ཀུན་མཁྱེན་ཀློང་ཆེན་རབ་འབྱམས་ཀྱིས། གྲོང་དང་དགོན་པ་རི་ཁྲོད་ལ་སོགས་པ། །གང་དུ་སྡོད་ཀྱང་སྒོས་འཛའ་མི་འཚོལ་ཞིང་། །སུ་དང་འགྲོགས་ཀྱང་མི་འཛའ་མི་འཁོན་པ། །རང་ཚུགས་འཛིན་པ་ཁོ་བོའི་སྙིང་གཏམ་ཡིན། །གསུངས་པ་ལྟར། རང་གི་ཆོས་ཀྱི་མཆེད་པོ་རྣམས་ཡིན་ཀྱང་ཐོག་མ་ནས་ཤིན་ཏུ་མཛའ་ཆེས་ན་མི་མཐུན་པ་བསླང་བའི་རྒྱུ་རེད། གཏན་ནས་མི་མཛའ་བ་ཡང་མ་ཡིན་པར་ཞེ་ཕུགས་ནས་བསམ་དཀར་ཕྱི་ཐག་རིང་བའི་སྒོ་ནས་འགྲོགས་རྒྱུ་ནི་བླ་མ་བརྒྱུད་པ་དང་བཅས་པའི་ཉམས་སུ་ལེན་བྱ་ཡིན་པས་དེ་ལ་ཅིས་ཀྱང་གཟབ་དགོས།

 

  མཇུག་མཐར་ཁྱེད་ཅག་གི་ཆོས་ཀྱི་ལམ་མཐར་ཕྱིན་པའི་སྨོན་འདུན་ཞུ།

 

 

  ཞེས་པའང་རྣམ་པར་རྒྱལ་བའི་མཆོད་རྟེན་མཐོང་གྲོལ་ཆེན་མོ་རབ་གནས་ཀྱི་ཉིན་གསར་དུ་རབ་བྱུང་བསྒྲུབས་པའི་རྒྱ་མི་འགའ་ལ་བླ་མ་བཀའ་དྲིན་ཅན་༸མཁན་ཆེན་དམ་པ་ཤེས་རབ་བཟང་པོ་མཆོག་གིས་ཚོགས་མང་དུ་གདམས་ངག་ཉུང་ངུ་ཞིག་གདམས་པ་ལྟར་བཀྲ་ཤིས་ཁྲི་གླིང་བོད་ཡིག་ཚོགས་ཆུང་གིས་བོད་ཡིག་ཏུ་གཏན་ལ་ཕབ་པ་བཀྲ་ཤིས་པར་གྱུར་ཅིག །

 

  དབེན་གནས་བཀྲ་ཤིས་ཁྲི་གླིང་གི་བོད་ཡིག་ཚོགས་ཆུང་ནས།

  

སྒྲོལ་མའི་ལྷ་ཉེར་གཅིག་གི་གཟུགས་ལམ་དང་ཡི་གེ

2017-11-05

 

 

 

 

 

  དབེན་གནས་བཀྲ་ཤིས་ཁྲི་གླིང་གི་བོད་ཡིག་ཚོགས་ཆུང་ནས།

  

རྒྱུ་མཚན་འདི་གཉིས་བསམས་ན་ཤན་པ་ཡིན་ཡང་ལས་མཚམས་འཇོག་སྲིད།

2017-11-04

  དེ་རིང་ནས་བཟུང་སྟེ་སྟོན་ཟླ་འབྲིང་པོ་ཚེས་ཚར་བ་རེད། ད་ནི་ཡང་ལོ་རེའི་ནང་ནས་ལས་ངན་པའི་དུད་འགྲོ་ཐམས་ཅད་གཤིན་རྗེའི་ཁྲམ་ཁར་འདེབས་རན་པའི་དུས་ཚོད་ལ་ཐུག་སོང་བ་རེད། ཐམས་ཅད་ཀྱིས་བཤས་ཉོ་བཤས་ཚོང་གི་ཐད་ནས་ཡིན་ཡང་འདྲ། རང་གིས་བཤའ་རྒྱུའི་ཐད་ནས་ཡིན་ཡང་འདྲ། རང་གི་ལུས་ལ་དཔེ་ལོངས་ལ། །གསུངས་པ་ལྟར་དུ། རང་དཔེ་གཞན་ལ་ལེན་ནས་སེམས་ཅན་དེ་དག་ལ་རྒྱུས་ལོན་སྤུས་གཙང་རེ་བྱེད་རྒྱུ་དེ་ཤིན་ཏུ་གལ་ཆེ་བ་རེད། དཔེར་ན། རང་ཅག་མི་རྣམས་ལ་བསམ་བློ་བཏང་ན། ཇ་ཐུན་གཅིག་ཞིམ་པོ་རྒྱགས་མོ་ཞིག་མ་རག་ནའང་ལུས་དང་སེམས་ལ་སྡུག་བསྔལ་འབྱུང་བ་རེད། དེ་བཞིན་དུ་སོ་ནད་ཙམ་ཞིག་ཕོག་ནའང་བཟོད་མི་ཐུབ་པ་ལྟ་བུའི་ཟུག་གཟེར་ཡོད་པ་རེད། དེ་ལ་བསམ་བློ་བཏང་ན་སེམས་ཅན་ལས་ངན་འདི་ཆ་ཁས་འུ་ཅག་ལ་ཞོ་འོ་མ་མར་ཕྱུར་བ། སྤུ། ཁུ་ལུ། ཐ་ན་ལྕི་བ་ཡན་ཆོད་ཀྱིས་དྲིན་གྱིས་བསྐྱངས་བསྐྱངས་མཐར། དྲིན་ཆེན་ལ་དྲིན་ལོག་བྱས་ནས་སྲོག་དམར་པོ་དེའང་བཅད་ན་རུང་ས་འགི་དང་མི་འགི   འུ་ཅག་རང་ཉིད་སེམས་ཅན་ལས་ངན་དེ་ཡིན་ན་ཅི་དྲན་ས་འགི  དེ་ལ་བསམ་བློ་ཐོངས་དང་། འདི་ཆ་ཁས་མི་སྐད་བཤད་མི་ཤེས་པ་ཙམ་རེད་མ་གཏོགས། ཚོར་བ་བདེ་སྡུག་ཡོད་ལུགས་ང་ཚོ་དང་འདྲ་འདྲ་རེད། བདེ་བ་ཕྲན་བུ་ཡིན་ཡང་འདོད་པ་རེད། སྡུག་བསྔལ་ཕྲན་བུ་ཡིན་ཡང་མི་འདོད་པ་རེད། དཔེར་ན། རྟ་ཟོག་སེམས་ཅན་འདི་དག་ལག་པས་ཕར་དཀྲོགས་ན་འདྲོགས་ཤེས་འདུག་ཨཱ། དེ་བཞིན་དུ་ཁ་སྐོམ་ན་ཆུ་འཚོལ་དུ་འགྲོ་ཤེས་འདུག  ད་རུང་ཡང་བདག་པོས་རང་ཉིད་བཤའ་བའི་གྲ་སྒྲིག་བྱེད་དུས་བཤའ་གྲི་ཡང་ས་འོག་ཏུ་བསྐུངས་པའི་ལོ་རྒྱུས་ཀྱང་བཤད་རྒྱུ་ཡོད་དར་ཨཱ། དེ་ཡིན་དུས། འུ་ཅག་མྱི་ཞིག་འདི་ན་ཁྲིད་ནས་ཤ་དུམ་བུ་དང་ཁྲག་ཐིགས་པ་བྱས་ནས་དམར་གསོད་བཏང་ན་སྐྱིད་རྒྱུ་རེད་དང་སྡུག་རྒྱུ་རེད། ཡང་དེ་དང་དེ་ལྟར་དམར་གསོད་གཏོང་ལ་ཉེ་བའི་མཚམས་སུ་སྲོག་ཁྲིམས་དེ་ལས་གཞན་ཞིག་གིས་བསྐྱབས་སོང་ན་སྐྱིད་རྒྱུ་རེད་དང་སྡུག་རྒྱུ་རེད། དེའི་ཕྱིར་ན་རང་གི་སྡུག་བསྔལ་ལ་ཡང་ཡང་བསམས་ནས་གཞན་ལ་སྡུག་བསྔལ་མི་སྤྲོད་རྒྱུ་དང་། རང་གི་བདེ་བ་ལ་ཡང་ཡང་བསམས་ནས་གཞན་བདེ་བ་དང་བདེ་བའི་རྒྱུ་ལ་འབད་རྒྱུ་དེ་ཤིན་ཏུ་གལ་ཆེ་བ་རེད།

 

 

  དེ་ནས་ཉེས་པ་ལ་བསམ་བློ་བཏང་ནའང་། སྲོག་གཅོད་གོང་ན་སྡིག་གཞན་མེད། །གསུངས་པ་རེད། དེ་མེད་ཚུལ་ཡང་ལུང་དང་རིགས་པ་གཞན་ཞིག་ལས་ཤེས་དགོས་པ་ཞིག་མ་རེད། རང་གིས་རང་ལ་བསམ་བློ་ཐོངས་དང་། འཇིག་རྟེན་གྱི་ཁམས་འདི་ན་རྒྱུ་རྫས་ལོངས་སྤྱོད་དང་ཐོབ་མངའ་ཐང་སོགས་ཅི་དང་ཅི་བས་ཀྱང་དམར་ཐང་ཆེ་བ་ནི་རང་གི་སྲོག་དམར་པོ་འདི་རེད་ཨཱ། དེ་ནི་རང་ཅག་འཇིག་རྟེན་མྱི་ཙམ་ཞིག་མ་རེད། རྟ་ཟོག་ར་ལུག་ལ་སོགས་སེམས་ཅན་ཐམས་ཅད་ལའང་རང་གི་སྲོག་དེ་ལས་གཅེས་པ་ཞིག་གང་ཡང་མེད་ཚུལ་ནི། རང་གི་སྲོག་སྲུང་བའི་ཕྱིར་དུ་གཞན་ གསོད་པའི་ལས་ཀྱང་ཅིར་མི་སྙམ་གྱིས་དང་དུ་ལེན་པ་རེད།  རྒྱུ་མཚན་དེའི་ཕྱིར་ན་གང་ལས་ཀྱང་གཅེས་པའི་སྲོག་དེ་ཉིད་འཕྲོག་པར་བྱས་ན་ཉེས་པ་ཆེ་དང་མི་ཆེ་བཤད་མ་དགོས་པ་རེད།

 

  དེས་ན་སྲོག་གཅོད་པའི་སྡུག་བསྔལ་དང་ཉེས་དམིགས་གཉིས་ལ་ངེས་ཤེས་ཡང་དག་པ་ཞིག་འདྲོངས་ན། ཤན་པ་ཡིན་ཡང་ལས་མཚམས་མི་འཇོག་རང་དབང་ཡོད་རྒྱུ་མ་རེད་བསམས།

 

  ཞེས་པ་ནི་དབེན་གནས་བཀྲ་ཤིས་ཁྲི་གླིང་གི་སྐབས་གཉིས་པའི་བསྙུང་གནས་ཆོས་འཚོགས་ཆེན་མོར་ ༸བླ་མ་རིན་པོ་ཆེ་ཤེས་རབ་བཟང་པོ་མཆོག་གིས་གསུངས་པའི་བཀའ་སློབ་ལས་བཏུས་པའོ། །

 

  དབེན་གནས་བཀྲ་ཤིས་ཁྲི་གླིང་གི་བོད་ཡིག་ཚོགས་ཆུང་ནས།

  

上一页
1 2 3 4 5 ...130

回到
顶部