分享到: 更多>>

མེ་བྱ་ལོའི་ཡིག་བརྒྱ་དགེ་སྐུལ་སྐོར་གྱི་གསུང་མཆིད།

2017-04-21

 

༈ བཤགས་སྦྱོང་དྲི་མེད་ཤེལ་དཀར།

[  ༣ ]

 

མེ་བྱ་ལོའི་ཡིག་བརྒྱ་དགེ་སྐུལ་སྐོར་གྱི་གསུང་མཆིད།

 

  ད་ནི་ད་ལོའི་ཡིག་བརྒྱ་དགེ་སྐུལ་གྱི་ཐད་ནས་མདོར་བསྡུས་ཤིག་ཞུས་ན། ད་ལོའི་ལོ་ལ་ཡིག་བརྒྱ་དགེ་སྐུལ་བྱེད་དགོས་པའི་རྒྱུ་མཚན་ནི། སྤྱིར་བཏང་ལོ་ཐམས་ཅད་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་འཕྲིན་ལས་འཇུག་པའི་དུས་ཚོད་ཡིན་པ་དང་། ཡང་སྒོས་ཁྱད་པར་ཅན་ད་ལོ་ལ་བསམ་བློ་བཏང་ན་ནི་མེ་མོ་བྱ་ཡི་ལོ་རེད། བྱ་ཡི་ལོ་ཐམས་ཅད་ནི་རང་རེ་རྣམས་ལ་བཀའ་དྲིན་མཚུངས་ཟླ་དང་བྲལ་བ་སྐྱབས་གཅིག་འཁོར་ལོའི་མགོན་པོ་ཆོས་རྗེ་ཡིད་བཞིན་ནོར་བུ་གང་ཉིད་མཚན་དཔེའི་སྐུ་ཡི་མེ་ཏོག་མི་མཇེད་འཇིག་རྟེན་གྱི་ཁམས་སུ་འཁྲུངས་པའི་དུས་ཚོད་བཟང་པོ་དཔེ་མེད་རེད། གཉིས་སུ་མཐའ་ཡས་པའི་སེམས་ཅན་འདི་དག་ཐམས་ཅད་གནས་སྐབས་ལུས་དང་སེམས་ཀྱི་སྡུག་བསྔལ་ཞི་ཕྱིར་དང་། ཁྱད་པར་དུ་སྙིགས་མའི་དུས་ཀྱི་ནད་མུག་འཁྲུག་རྩོད་སོགས་སྡུག་བསྔལ་མཐའ་དག་ཡོངས་སུ་ཞི་ནས། མཐར་ནུབ་ཕྱོགས་བདེ་བ་ཅན་གྱི་ཞིང་ཁམས་གང་ཡིན་པ་དེ་རུ་སྐྱེས་ནས་མགོན་པོ་འོད་དཔག་མེད་དང་གཉིས་སུ་མེད་པའི་སྐྱབས་རྗེ་ཡིད་བཞིན་ནོར་བུའི་ཟབ་རྒྱས་ཀྱི་གདམས་པའི་འོག་ནས་རྣམ་གྲོལ་གཏན་གྱི་བདེ་བ་རྫོགས་པའི་སངས་རྒྱས་ཀྱི་གོ་འཕང་ཐོབ་པ་ལ་དམིགས་ནས་ད་ལོ་ལོ་གཅིག་ལ་ངེད་ཅག་གིས་ཡིག་བརྒྱ་དགེ་སྐུལ་བྱས་དང་བྱེད་བཞིན་པ་རེད། དེ་ཡང་ཡི་གེ་བརྒྱ་པའི་ཕན་ཡོན་ནི། སྙིང་པོ་རྒྱན་ལས། པད་དཀར་ཟླ་བའི་གདན་གནས་པའི། །རྡོ་རྗེ་སེམས་དཔའ་ལེགས་དམིགས་ཏེ། །ཡི་གེ་བརྒྱ་པ་ཆོ་ག་བཞིན། །ཉི་ཤུ་རྩ་རེ་བཟླས་གྱུར་ན། །ལྟུང་སོགས་བྱིན་གྱིས་བརླབས་འགྱུར་ཕྱིར། །འཕེལ་བ་རུ་ནི་མི་འགྱུར་ཞེས། །གྲུབ་པ་མཆོག་རྣམས་ཀྱི་བཤད་པས། །རྟག་པར་དུ་ནི་ཉམས་སུ་བླང༌།།འབུམ་ཕྲག་གཅིག་ཏུ་བཟླས་གྱུར་ན། །རྣམ་པར་དག་པའི་བདག་ཉིད་འགྱུར། །ཞེས་དང་། དྲི་མེད་བཤགས་རྒྱུད་ལས། དུས་གསུམ་བདེ་གཤེགས་ཐམས་ཅད་ཀྱིཿ ཡང་སྙིང་ཡི་གེ་བརྒྱ་པ་འདིཿ བདུན་ནམ་ཉི་ཤུ་རྩ་གཅིག་གམཿ བརྒྱ་དང་རྩ་བརྒྱད་བརྗོད་གྱུར་ནཿ མཚམས་མེད་ལྔ་ཡི་སྡིག་པ་བྱངཿཉམས་ཆག་མ་ལུས་ཀུན་བྱང་ནསཿ དུས་གསུམ་སངས་རྒྱས་ཐམས་ཅད་ཀྱིཿ སྲས་ཀྱི་དམ་པར་དགོངས་པར་གྱུརཿཞེས་ཡི་གེ་བརྒྱ་པ་འབུམ་ཕྲག་གཅིག་བཟླས་ན་རྩ་བའི་དམ་ཚིག་ཉམས་པའང་ལྷག་མེད་དུ་འདག་པ་དང་། ཉིན་རེར་ཡིག་བརྒྱ་ཚར་༡༠༠རེ་བཟླས་ན་ཉིན་དེའི་སྡིག་ལྟུང་ལྷག་མེད་དུ་འདག་པ་དང་། ཉིན་རེར་ཚར་༢༡རེ་བཟླས་ན་དེས་སྡིག་ལྟུང་གོང་དུ་འཕེལ་བར་མི་འགྱུར་བ་སོགས་ཡིག་བརྒྱའི་ཕན་ཡོན་བསམ་གྱིས་མི་ཁྱབ་པ་གསུངས་པས་ངོ་མ་སྡིག་སྒྲིབ་འདག་པ་ལ་འདི་ལས་ལྷག་མེད་རྒྱུ་ཅན་དེ་རེད་བསྡད་ཡོད་པ་རེད། ཡིག་བརྒྱ་འདོན་བྱེད་ཀྱི་ཆོ་ག་ལ་རབ་ན་དྲི་མེད་བཤགས་རྒྱུད་དང་། མིན་ནའང་ཆོ་ག་ཚད་ལྡན་རྒྱས་བསྡུས་གང་རུང་ལ་བརྟེན་ནས་བསྒྲུབས་ན་ཆོག་རེད། གལ་སྲིད་ཆོ་ག་འདོན་མ་ཤེས་པ་དང་མི་ཁོམ་པ་དེ་འདྲ་ཡིན་ན། སྦྱོར་དངོས་རྗེས་གསུམ་ཚང་བའི་སྒོ་ནས་ཡིག་བརྒྱ་རྐྱང་པ་འདོན་ནའང་ཆོག་རེད། དེས་ན་དགེ་སྐུལ་འདི་ཉིད་རང་གཞན་གཉིས་ཀའི་དོན་ལ་བརྩིས་ནས་ནང་དུ་ཞུགས་དང་ད་སྐབས་དངོས་སུ་གཅིག་བརྩི་གཉིས་བགྲང་གིས་དགེ་རྩ་འབོར་སྡོམ་བྱུང་ཐུབ་ཡོད་པ་དེ་ལ་བསམ་བློ་བཏང་ནའང་། ཡི་གེ་བརྒྱ་པ་དུང་ཕྱུར་༣༦༠ལྷག་ཙམ་ཞིག་དགེ་སྐུལ་འགྲུབ་འདུག  དེ་ཡང་དཔེ་མེད་དགེ་རྩ་རྒྱ་ཆེན་པོ་སྐྲག་མོ་རེད། དེ་སྔར་མ་ཞུགས་མཁན་ཐམས་ཅད་ཀྱིས་ཀྱང་འདི་ལ་འབྲེལ་འཇོག་རེ་ཨི་ཐུབ་ལྟོས་དང་། སྤྱིར་བཏང་གང་ཟག་སྒེར་གྱི་སྡིག་པ་བཤགས་ནའང་སྡིག་པ་མི་འདག་པ་མ་རེད་དེ། ཐུན་མོང་གི་དགེ་རྩ་འདི་དང་འདི་ལྟ་བུ་མཉམ་དུ་སྒྲུབ་པ་ཡིན་ན་ནི། གང་ཟག་བྱིན་རླབས་མེ་སྟག་འདྲ།།ཚོགས་པའི་བྱིན་རླབས་མེ་དཔུང་འདྲ།།ཞེས་མི་སྒེར་དང་ཚོགས་པའི་དགེ་རྩ་གཉིས་ལ་ཕན་ཡོན་ཆེ་ཆུང་ཁྱད་པར་ཆེ་ཞེས་གསུངས་ཡོད་པ་རེད། དེ་དོན་དག་གཅིག་ཡིན། དོན་དག་གཉིས་པ་ཡིག་བརྒྱ་དགེ་སྐུལ་དུ་ཞུགས་མཁན་མི་ཉུང་བ་ཞིག་གིས་ཡིག་བརྒྱས་མ་ཚད་དྲི་མེད་བཤགས་རྒྱུད་ཀྱང་ཚར་བྱེ་བ་༤ལྷག་ཅིག་ཁས་ལེན་བྱས་འདུག   དེ་ཆེད་དུ་དགེ་སྐུལ་བྱས་པ་མ་རེད་དེ། ཁྱེད་ཅག་གིས་དེའི་ནང་ལའང་འབྲེལ་འཇོག་ཐུབ་ན་དྲི་མེད་བཤགས་རྒྱུད་འདི་ཕན་ཡོན་ཤིན་ཏུ་ཆེ་ཚུལ་ཡང་། མཚམས་མེད་ལྔ་ཡི་སྡིག་པ་བྱང་༔ དམ་ཚིག་ཉམས་ཆག་སོར་ཆུད་ནས༔ ན་རཀ་གནས་ཀྱང་དོང་ནས་སྤྲུགས༔ མཆོག་དང་ཐུན་མོང་དངོས་གྲུབ་ཐོབ༔ ཚེ་འདིར་བདེ་ལེགས་ཕུན་སུམ་ཚོགས༔ ཚེ་འདས་སྐུ་གདུང་རིང་བསྲེལ་འབྱུང་༔ ཕྱི་མ་རིག་འཛིན་ཞིང་དུ་འགྲོ༔ དེ་སྐད་ཀློང་བཤགས་རྒྱུད་ནས་གསུངས༔ཞེས་དང་། སྒྱུ་འཕྲུལ་ཞི་ཁྲོ་འདི་དག་གིཿ མཚན་ནས་ལན་གཅིག་རྗོད་བྱེད་ཅིང་ཿ གང་གིས་གུས་པས་ཕྱག་འཚལ་ནཿཉམས་ཆག་བསྐངས་ནས་དངོས་གྲུབ་ཐོབཿ དེ་ཕྱིར་གུས་པར་ཕྱག་འཚལ་ལོཿ ཞེས་དང་། གསང་སྔགས་འདི་ལན་ཅིག་བརྗོད་པ་ཙམ་གྱིས་ཀྱང་མཚམས་མེད་པ་ལྔ་ཡང་དུང་ཕྱིས་པ་ལྟར་འགྱུར་རོ༔ ཞེས་ཕན་ཡོན་ཚད་མེད་པ་གསུངས་པས་རྒྱུན་དུ་ཡི་དམ་དུ་བྱེད་པ་གལ་ཆེ། དགེ་སྐུལ་གྱི་ནང་དུ་ཇི་ལྟར་ཞུགས་དགོས་པ་རེད་ཟེར་ན་བྱང་ཆུབ་གླིང་དྲྭ་ཚུགས་སུ་རང་རང་གིས་མིང་ཐོ་འགོད་ནའང་ཆོག་པ་རེད། མ་ཟད་མཁན་པོ་རྣམ་པ་ལ་ཁ་པར་གྱི་ལམ་ནས་འབྲེལ་བ་བྱས་ནའང་ཆོག་པ་རེད།

 

 

  ད་ལོ་ངེད་ཅག་ལྷན་དུ་འདི་འདྲའི་དགེ་རྩ་རྒྱ་ཆེན་ཞིག་སྒྲུབ་པའི་སྐལ་བ་བྱུང་ཡོད་པ་རེད་དེ། སང་ཕོད་དང་དེའི་ལོ་ཕྱི་མ་རྣམས་སུ་འདི་འདྲའི་གོ་སྐབས་ཤིག་ཨི་རྙེད་ཀྱང་གཏན་ནས་ཤེས་མ་རེད། གལ་ཏེ་རྙེད་ནའང་འདི་འདྲའི་དགེ་རྩ་ཆེན་པོ་ཞིག་ཐམས་ཅད་ལྷན་དུ་བསྒྲུབ་ཟེར་དགོས་ནའང་དེ་བས་ཀྱང་དཀའ་མོ་ངོ་མ་ཡིན་རྒྱུ་རེད། དགེ་རྩ་རྒྱ་ཆེན་པོ་འགྲུབ་ཡོད་ཟེར་ནས་གྲངས་ཀ་དང་བཅས་པ་བསྒྲག་རྒྱུ་འདི་ང་རང་གིས་ཁ་ཞེ་མེད་པ་དགེ་རྩ་ངོམ་པ་ནི་མིན། ངོ་མ་ཐམས་ཅད་དགེ་སྐུལ་ལ་སྤྲོ་བ་སྐྱེ་བྱེད་དང་ཡི་རང་གི་རྟེན་དུ་དགེ་སྐུལ་འགྲུབ་ལུགས་འདི་ཞུ་འདུག་པ་ཡིན་མ་གཏོགས་དེ་བས་བསྒྲགས་མ་བསྒྲགས་མི་འདུག་ཀྱང་། ངོ་མ་རང་རོགས་སུ་ཡིན་ཡང་སྡིག་པ་མེད་མཁན་ཞིག་དཀོན་མོ་ཡིན་རྒྱུ་རེད། བཤགས་དགོས་དྲན་མཁན་ཡང་དཀོན་མོ་ཡིན་རྒྱུ་རེད། བཤགས་བསམ་ན་ཇི་ལྟར་བཤགས་དགོས་ཤེས་མཁན་དེ་ཡང་དཀོན་མོ་ཡིན་རྒྱུ་རེད་དེ། ད་རེས་ཐམས་ཅད་ཀྱིས་དགེ་རྩ་འདི་དང་ལྷན་དུ་རང་གིས་རབ་ན་ཡིག་བརྒྱ་བྱེ་བ་རེ་ཙམ་དང་འབྲིང་ན་འབུམ་ཕྲག་ཁ་ཤས། ཐ་ནའང་འབུམ་ཕྲག་གཅིག་ཙམ་རེ་ཁས་ལེན་བྱོས་དང་། ཉི་མ་རེ་ལ་ཕྲེང་སྐོར་གསུམ་ཙམ་རེ་བཏོན་ན་ལོ་གཅིག་གིས་འབུམ་ཐེར་གཅིག་དོ་འགྲོ་བ་རེད། དེ་ཡང་མོས་པ་ཡོད་ན་ཧ་ལས་པའི་འགྲུབ་དཀའ་མོ་ངོ་མ་མ་རེད། གཏན་ནས་ཁས་ལེན་བྱེད་མ་ཐུབ་ན། དགེ་རྩ་གང་ཡིན་ཡང་རང་གིས་ལྷག་བསམ་དག་པས་ཡི་རང་ཙམ་བྱས་ནའང་། མདོ་སྡུད་པ་ལས། སྟོང་གསུམ་རི་རབ་སྲང་ལ་གཞལ་བས་ཚད་གཟུང་རུང་།།རྗེས་སུ་ཡི་རང་དགེ་བ་དེ་ནི་དེ་ལྟར་མིན།།ཞེས་དང་། ཡང་མཁས་གྲུབ་ཀརྨ་ཆགས་མེད་ཀྱིས། སྙིང་ནས་དགའ་བའི་རྗེས་སུ་ཡི་རང་ན།།དེ་ཡི་བསོད་ནམས་མཉམ་དུ་ཐོབ་པར་གསུངས།།ཞེས་རང་གིས་དངོས་སུ་མ་བསྒྲུབས་ཀྱང་གཞན་གྱི་དགེ་བ་ལ་རྗེས་སུ་ཡི་རང་བྱས་ན་དགེ་རྩ་དེ་དག་རང་ལའང་འདྲ་འདྲ་ཐོབ་ཡོང་གསུངས་པ་རེད།

 

  ❖  ཅེས་པ་ནི་བླ་མ་ཤེས་རབ་བཟང་པོའི་གསུང་ཟིན་གསར་པ་བཤགས་སྦྱོང་དྲི་མེད་ཤེལ་དཀར་ཞེས་པ་ལས་བཏུས།

 

མུ་འགོད།

 

 

དབེན་གནས་བཀྲ་ཤིས་ཁྲི་གླིང་གི་བོད་ཡིག་ཚོགས་ཆུང་ནས།

  

ངག་གི་མི་དགེ་བའི་རྣམ་སྨིན།

2017-04-19

  

 

རྫུན་དུ་སྨྲ་བའི་ཁ་ན་མ་ཐོ་བ་གང་ཡིན་པ་དེ་ནི་སེམས་ཅན་རྣམས་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དག་ཏུ་ལྟུང་བར་བྱེད་དོ།། གལ་ཏེ་མིར་སྐྱེས་པར་གྱུར་ན་ཡང་། རྣམ་པར་སྨིན་པའི་འབྲས་བུ་རྣམ་པ་གཉིས་འཐོབ་པར་འགྱུར་ཏེ། སྐུར་བ་མང་བ་དང་། རྟག་པར་གཞན་གྱིས་མང་དུ་བསླུས་པར་འགྱུར་བ་གང་ཡིན་པའོ།།

 

  ཕྲ་མ་བྱས་པའི་ཁ་ན་མ་ཐོ་བ་གང་ཡིན་པ་དེས་ནི་སེམས་ཅན་རྣམས་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དག་ཏུ་ལྟུང་བར་བྱེད་དོ།།གལ་ཏེ་མིར་སྐྱེས་པར་གྱུར་ན་ཡང་། རྣམ་པར་སྨིན་པའི་འབྲས་བུ་རྣམ་པ་གཉིས་འཐོབ་པར་འགྱུར་ཏེ། རྟག་པར་སྒྲ་མི་སྙན་པ་ཐོས་པར་འགྱུར་བ་དང་། གང་ཅི་སྨྲས་ཀྱང་རུང་སྟེ། རྒྱུན་དུ་རྩོད་པ་ཅན་དུ་འགྱུར་གང་ཡིན་པའོ།།

 

  ཚིག་ཀྱལ་པ་སྨྲས་པའི་ཁ་ན་མ་ཐོ་བ་གང་ཡིན་པ་དེ་ནི་སེམས་ཅན་རྣམས་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དག་ཏུ་ལྟུང་བར་བྱེད་དོ།། གལ་ཏེ་མིར་སྐྱེས་པར་གྱུར་ན་ཡང་། རྣམ་པར་སྨིན་པའི་འབྲས་བུ་རྣམ་པ་གཉིས་འཐོབ་པར་འགྱུར་ཏེ། བདེན་པ་ཞིག་སྨྲས་ན་ཡང་གཞན་དག་ཡིད་མི་ཆེས་པར་འགྱུར་བ་དང་། ཚིག་སྨྲས་པ་རྣམས་གཞན་གྱིས་གོ་བར་མི་འགྱུར་བ་གང་ཡིན་པའོ།།

 

  ❖ ཞེས་པ་ནི་འཕགས་པ་ལེགས་ཉེས་ཀྱི་རྒྱུ་འབྲས་བསྟན་པའི་མདོ་ཞེས་བྱ་བ་ལས་བཏུས་ཏེ་སྤེལ་བའོ།།

 

未完待续

དབེན་གནས་བཀྲ་ཤིས་ཁྲི་གླིང་གི་བོད་ཡིག་ཚོགས་ཆུང་ནས།

  

སྡིག་ལྟུང་བཤགས་ཐབས་གཉེན་པོ་སྟོབས་བཞི་ལ་བསྟེན་ཚུལ།

2017-04-17

 

༈ བཤགས་སྦྱོང་དྲི་མེད་ཤེལ་དཀར།

[ ༢ ]

 

བཤགས་པའི་ཐབས་གཉེན་པོ་སྟོབས་བཞི་ལ་བསྟེན་ཚུལ།

 

  དེ་ཡང་བདག་ཅག་གི་སྟོན་པ་རྫོགས་པའི་སངས་རྒྱས་ཁོང་ཉིད་སངས་རྒྱས་པའི་དམིགས་ཡུལ་ནི་རང་རེ་སེམས་ཅན་རྣམས་ཀྱི་ལུས་སེམས་ཀྱི་སྡུག་བསྔལ་གཉིས་པོ་བསལ་བའི་ཆེད་དུ་ཡིན་པས། གང་སྡིག་པ་ལ་བརྟེན་ནས་བྱུང་བའི་རྟེན་འབྱུང་གི་རྣམ་སྨིན་ཚབས་ཆེན་དེ་དག་སྨིན་པར་འགོག་པའི་ཐབས་ཤེས་ཇི་སྙེད་ཅིག་གསུངས་ཡོད་ནའང་། སྡིག་པ་བཤགས་པ་ནི་མཐར་གཏུགས་ན་རང་ལ་སྨིན་པར་འགྱུར་བའི་རྣམ་སྨིན་ཡིད་དུ་མི་འོང་བ་དེའི་རྒྱུ་ཟློག་ཐབས་ལ་བརྩོན་པ་དེ་ཡིན། སྤྱིར་བཏང་རང་ཅག་རྣམས་ཤིན་ཏུ་རྨོངས་ཡོད་ས་ཞིག་ནི་སྡུག་བསྔལ་ལ་ཤིན་ཏུ་སྐྲག་ནའང་སྡུག་བསྔལ་གྱི་རྒྱུ་ཕྲ་རགས་རྣམས་ཅིར་མི་སྙམ་དུ་སྒྲུབ་པ་དེ་རེད། རྒྱུ་འབྲས་བླང་དོར་ལ་མིག་བཞིན་སྲུང་ཞེས་པའང་འབྲས་བུ་ཡིད་དུ་མི་འོང་བར་འབྱིན་པའི་རྒྱུ་མི་སྒྲུབ་པ་ཙམ་ལ་ཟེར་ན་ཆོག་པ་ཡིན། དཔེར་ན་གདུགས་ཀྱི་གྲིབ་མ་བཟློག་དགོས་ན་གྲིབ་མ་བཟློག་པ་བས་གདུགས་བཟློག་པའི་ལས་ལ་བརྩོན་དགོས་པ་ལྟ་བུ་རེད། སྐབས་འདིར་རང་ཅག་ལ་ཤིན་ཏུ་འཚམས་ཤིང་ཕན་ཡོན་ཆེ་བའི་སྡིག་པ་བཤགས་ཐབས་ཡག་ཤོས་གཅིག་ཡོད་པ་ནི་གཉེན་པོ་སྟོབས་བཞི་ལ་བརྟེན་ནས་གང་བྱས་པའི་སྡིག་པ་རྣམས་མཐོལ་ཞིང་བཤགས་པ་འདི་ཉིད་རེད།

 

  སྤྱིར་བཏང་ཕྱོགས་བཅུའི་ཞིང་རབ་འབྱམས་ན་བཞུགས་པའི་རྒྱལ་བ་སྲས་དང་བཅས་པ་ཐམས་ཅད་སྡིག་པ་བཤགས་པའི་རྟེན་མི་བསླུ་བ་ཡིན་པ་དང་། རང་གཞན་གང་གི་དོན་དུ་ཡིན་ཡང་སྡིག་སྒྲིབ་སྦྱོང་བ་ལ་དམིགས་ནས་དགེ་རྩ་ཅི་དང་ཅི་བསྒྲུབས་ན་ཐམས་ཅད་སྡིག་པ་བཤགས་པའི་ཐབས་ཡང་དག་ཡིན་མོད་ཀྱང་། དཔལ་ལྡན་རྡོ་རྗེ་སེམས་དཔའ་ལ་བརྟེན་ནས་སྡིག་པ་བཤགས་པ་ནི་དེ་དག་ལས་ཀྱང་ཕན་ཡོན་ཆེ་བའི་བདག་ཉིད་ཅན་ཡིན་པ་གསུངས་ཡོད། དེ་ལ་ཐོག་མར་རབ་གནས་ཐོབ་པའི་བླ་མ་རྡོ་རྗེ་སེམས་དཔའི་ཞལ་ཐང་ཚད་ལྡན་ཞིག་བཙལ་ནས། དད་སེམས་རྩེ་གཅིག་པས་མིག་གིས་དེ་ཉིད་ལ་ཡང་ཡང་བལྟ་དགོས། སྐབས་སྐབས་སུ་སྐུ་ལུས་ཧྲིལ་པོ་ལ་བལྟ་དགོས། སྐབས་སྐབས་སུ་ཆ་ཤས་རེ་རེ་ལ་བལྟ་དགོས། བར་མཚམས་སུ་མིག་བཙུམ་པའི་གནས་སྐབས་སུ་ཡང་བླ་མ་རྡོ་རྗེ་སེམས་དཔའ་གང་ཡིན་པ་དེ་ཉིད་མཚན་དང་དཔེ་བྱད་བཀྲ་ལམ་མེར་ཡིད་ལ་བྱེད་ཐུབ་པར་བྱས་ཏེ་སྐྱབས་འགྲོ་དང་ངེས་འབྱུང་། བྱང་ཆུབ་ཀྱི་སེམས། སྙིང་རྗེ་ལྟ་བུ་བསྒོམ་དགོས། རང་ལ་སྣང་བའི་རྡོ་རྗེ་སེམས་དཔའི་རྣམ་པ་ནི་རྡོ་རྗེ་སེམས་དཔའ་དངོས་ཡིན་བསམ་དགོས་པ་རེད། དེ་ཡང་ཡིན་ཏེ། མདོ་ལས། གང་གིས་མོས་པ་ཡིད་བྱེད་པ།།དེ་ཡི་མདུན་ན་ཐུབ་པ་བཞུགས།།གསུངས་པ་རེད། དེ་དོན་དག་དང་པོ་ཡིན།

 

  དོན་གཉིས་པ་རང་གིས་སྔར་བྱས་པའི་སྡིག་པ་མི་དགེ་བ་ཐམས་ཅད་རྡོ་རྗེ་སེམས་དཔའ་དེའི་མདུན་ནས་དྲན་ཨི་དོ་མི་དོ་བལྟ། དྲན་ཚད་རྣམས་བློ་ཡུལ་དུ་ལེན། མ་དྲན་ཚད་ཐམས་ཅད་ཀྱང་རྒྱལ་བ་སྲས་བཅས་ཀྱི་མདུན་ནས་འགྱོད་པ་དྲག་པོས་བཤགས་དགོས། དེ་ཡང་། འགྱོད་པ་མེད་ན་བཤགས་པས་མི་འདག་པས། །ཞེས་གསུངས་པ་བཞིན། འགྱོད་པ་ལས་གཞན་པ་གང་ཡང་བསྒྲུབས་མ་ཐུབ་ནའང་སྡིག་པ་མང་པོ་འདག་ཐུབ་ཅེས་གསུངས་ཡོད་ན། འགྱོད་པ་ཡོད་པ་གཞིར་བཞག་ནས་བཤགས་ན་སྡིག་པའི་འབྲས་བུ་ཡོངས་སུ་ལྡོག་ཐུབ་པ་སྨོས་མ་དགོས་པ་རེད། རབ་ན་དཔལ་རྡོ་རྗེ་སེམས་དཔའི་མདུན་ནས་ངོ་ཚ་དང་འཇིགས་སྐྲག འགྱོད་པ་ཆེན་པོའི་ངང་ནས་ངས་ནི་དེ་སྔར་མ་རིག་པའི་དབང་གིས་སྡིག་པ་འདི་དང་འདི་ལྟ་བུ་བསགས་ཡོད། ཁྱེད་ཀྱིས་སྡིག་སྒྲིབ་དེ་རྣམས་མ་ལུས་འདག་ཏུ་བཅུག་རོགས་ཞེས་དངོས་སུ་ངག་ཏུ་བརྗོད་ན་ཤིན་ཏུ་ལེགས་ཏེ། དེ་ཡང་། སངས་རྒྱས་འཕགས་པ་རྣམས་ལ་སེམས་ཅན་ལ་སྙིང་རྗེ་ཕྱོགས་མེད་དུ་ཡོད་པ་སྨྲོས་མ་དགོས་ནའང་། བཞི་བརྒྱ་པ་ལས། ཇི་ལྟར་མ་ནི་ཁྱད་པར་དུ། །ནད་ཐེབས་བུ་ལ་གདུང་འགྱུར་བ། །ཞེས་གསུངས་པ་ལྟར། སྤྱིར་བཏང་མ་རྒན་རྣམས་རང་གི་བུ་རྒྱུད་ཐམས་ཅད་ལ་གཅེས་པ་ཡིན་ཀྱང་། དེའི་ནང་ནས་ན་བའི་བུ་ལ་ལྷག་པར་གཅེས་པ་ནང་བཞིན། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་སེམས་ཅན་ཐམས་ཅད་ལ་ཐུགས་བརྩེ་བ་ཆེན་པོས་ཕྱོགས་མེད་དུ་རྗེས་སུ་བཟུང་ཡོད་པ་འདྲ་ཡང་། སྡུག་བསྔལ་ཆེན་པོ་ཅན་རྣམས་ལ་ནི་དེ་བས་ཀྱང་རྗེས་སུ་བཟུང་ཡོད་པ་ཡིན།

 

  དོན་གསུམ་པ་འགྱོད་པ་ཡོད་པ་ཙམ་གྱིས་མི་ཆོག་པར་ཕྱིན་ཆད་དེ་ལྟ་བུའི་སྡིག་པ་ཞིག་རང་གི་སྲོག་དམར་པོ་འདི་ལ་ཐུག་སོང་ནའང་མི་བསྒྲུབ་སྙམ་པའི་དམ་བཅའ་བྱེད་དགོས། དེ་ཡང་སྡིག་པ་སྣ་གཅིག་ཀྱང་མི་བསྒྲུབ་པའི་དམ་བཅའ་བྱེད་ཐུབ་ན་ཨང་དང་པོ་རེད། དེ་ལྟར་མ་ཐུབ་ནའང་ངེས་པར་དུ་སྡིག་པ་ཚབས་ཆེན་འགའ་རེ་དམིགས་ཀྱིས་བཟུང་ནས་མི་བསྒྲུབ་པའི་དམ་བཅའ་སེམས་གཏིང་ནས་བྱེད་དགོས།

 

  བཞི་པ་བླ་མ་རྡོ་རྗེ་སེམས་དཔའ་ལ་དད་པ་རྩེ་གཅིག་བཞག་ནས་ཡིག་བརྒྱ་དང་ས་ཏྭ་བཟླས་བརྗོད་ལ་བརྩོན་པ་ནི་གཉེན་པོ་ཀུན་ཏུ་སྤྱོད་པའི་སྟོབས་ཡིན། དེ་ལྟར་མིན་ཡང་། དུས་དང་རྣམ་པ་ཀུན་ཏུ་རང་གཞན་གྱི་སྡིག་སྒྲིབ་འདག་པའི་ཕྱིར་དུ་ཐོས་བསམ་སྒོམ་གསུམ་དང་འཆད་རྩོད་རྩོམ་གསུམ། ཕྱག་སྐོར་སྒྲིབ་སྦྱོང་། ཁ་མ་ཎི། ལག་ཕྲེང་བ་གང་བྱས་ཀྱང་དེ་ཡང་སྡིག་སྒྲིབ་བཤགས་པའི་གཉེན་པོ་ཀུན་ཏུ་སྤྱོད་པའི་སྟོབས་ཡིན། དེ་བཞི་པོ་ནི་སྡིག་པ་བཤགས་པ་ལ་མེད་དུ་མི་རུང་བའི་གཉེན་པོ་སྟོབས་བཞི་ཞེས་པ་དེ་ཡིན། དེ་རིང་ཤིན་ཏུ་བསྡུས་པ་ཞིག་ལས་ཞུ་ཐུབ་མ་སོང་སྟེ། ཁྱེད་ཅག་གིས་ངེས་པར་དུ་རང་གི་བླ་མ་དང་མཁན་པོ་ལྟ་བུ་མདོར་ན་རང་གི་ཉེ་འཁོར་ན་ཤེས་མི་སུ་ཡོད་ན་དེའི་ཟུར་ནས་གཉེན་པོ་སྟོབས་བཞི་ཡང་དག་པ་ཞིག་ཨི་ཤེས་ལྟོས། སྟོབས་བཞི་ལ་མ་བརྟེན་ན་སྡིག་པ་ཡང་དག་པ་ཞིག་བཤགས་ཐབས་མེད་ནའང་། སྟོབས་བཞི་ལ་བརྟེན་ན་ནི། སྡོམ་གསུམ་རྣམ་ངེས་ལས་ཀྱང་། མདོར་ན་སྟོབས་བཞིར་མ་འདུས་བཤགས་པ་མེད། །ཅེས་གསུངས་པ་ལྟར་ཤིན་ཏུ་གལ་ཆེ། དེ་དག་ཤེས་པའི་འོག་ཏུ་རང་གིས་དུས་ཚོད་ཅི་ཁོམ་དང་ནུས་པ་ཅི་ཡོད་ཀྱི་སྒོ་ནས་ཉམས་སུ་ལེན་རྒྱུ་མ་ཡོ་མ་འཆུགས།

 

  ❖ ཞེས་པ་ནི་བླ་མ་ཤེས་རབ་བཟང་པོའི་གསུང་གསར་པ་བཤགས་སྦྱོང་དྲི་མེད་ཤེལ་དཀར་ཞེས་པ་ལས་བཏུས།

 

མུ་འགོད།

 

དབེན་གནས་བཀྲ་ཤིས་ཁྲི་གླིང་གི་བོད་ཡིག་ཚོགས་ཆུང་ནས།

  

བླ་མ་དང་མཇལ་བའི་མི་ཚེ། 想念上师

2017-04-16

 

 

 རྩ་བའི་བླ་མས་ལམ་སྟོན་གྱི་འོག་ནས་ཆོས་ལ་སློབ་སྦྱོང་སྒོམ་སྒྲུབ་བྱེད་པའི་ལོ་ཟླ་དེ་དག་ནི་ངའི་མི་ཚེའི་ཁྲོད་ཀྱི་ཆེས་བདེ་སྐྱིད་དང་དོན་སྙིང་ལྡན་པའི་དུས་སྐབས་ཡིན། འོན་ཀྱང་དུས་སྐབས་དེ་དུས་ཀྱི་ལོ་ཟླ་དག་ནི་ནམ་ཡང་ཕྱིར་མངོན་མི་སྲིད། རང་ལ་མི་རྟག་པ་སྟོན་པའི་བླ་མ་དག་ད་སྐབས་མི་ཉུང་བ་ཞིག་མི་རྟག་པའི་རང་བཞིན་གྱིས་མྱ་ངན་ལས་འདའ་བའི་ཚུལ་བསྟན་སོང་། ང་རང་ཕལ་བ་ཞིག་ལ་མཚོན་ན། སྐྱེ་བ་སྔོན་མའི་དོན་དག་ཚང་མ་མི་ཤེས་མོད། འོན་ཀྱང་སྐྱེ་བ་འདིའི་སྟེང་ནས་ལས་སྨོན་གྱིས་ཕྲད་པའི་བླ་མ་དག་གི་བཀའ་དྲིན་ནི་ནམ་ཡང་སེམས་ལ་བཟུང་ཡོད།

 

མཁན་པོ་ཤེས་རབ་བཟང་པོས།

དབེན་གནས་བཀྲ་ཤིས་ཁྲི་གླིང་གི་བོད་ཡིག་ཚོགས་ཆུང་ནས།

  

༈ ཤི་དུས་སྒོར་མོས་ཕན་མི་ཐོགས།没有必要拥有太多

2017-04-15

  

 

༈ ཤི་དུས་སྒོར་མོས་ཕན་མི་ཐོགས།

 

  དགོས་ངེས་ཀྱི་སྒོར་མོ་འདང་ཚད་ཅིག་བཀོལ་རྒྱུ་ཡོད་ན་ཆོག་ཤེས་པར་བྱ་དགོས་པ་རེད་མ་གཏོགས་མི་ཚེ་སྒོར་མོའི་རྩོལ་སྒྲུབ་ལ་ཟད་པའི་ཚོང་ཆེན་དག་ཡིན་ཀྱང་། ཤི་དུས་ལས་དཀར་ནག་གི་རྗེས་སུ་འབྲང་དགོས་ཀྱི་འཆི་བ་གདོང་ལེན་པ་ལ་ནོར་གྱིས་བསྐྱབས་པ་སུ་ཡང་མ་བྱུང་ལ་འབྱུང་བའང་མི་སྲིད། དེས་ན་འཆི་ཆོས་དགེ་བ་དེ་ཡང་གསོན་པའི་སྐད་ཅིག་འདི་ཉིད་དམ་དུ་བཟུང་ནས་མ་བསྒྲུབས་ན། མིག་འཛུམ་ཙམ་གྱི་རྗེས་སུ་འཆི་བ་མགོ་ཐོག་ཏུ་མི་ཡོང་བའི་ངེས་པ་གཏན་ནས་མེད་པས་དེ་དུས་ཇི་ལྟར་བྱའམ།

 

མཁན་པོ་ཤེས་རབ་བཟང་པོས།

 

དབེན་གནས་བཀྲ་ཤིས་ཁྲི་གླིང་གི་བོད་ཡིག་ཚོགས་ཆུང་ནས

 

上一页
1 2 3 4 5 ...101

回到
顶部